أفكار ذكية ومفيدة لترتيب وتنظيم المنزل

أفكار ذكية ومفيدة لترتيب وتنظيم المنزل – بالتأكيد لا يحب أحد أن يعيش في مكان غير منظم أو كمان نقول بالعامية ملخبط  (سنستكمل باقي المقال بالعامية 🙂 ) عشان دايما بيكون سبب في الأكتئاب و التوهان عشان كده لما بتحاول تخلي حياتك و بيتك منظم بمساعدة شوية أدوات هتلاقي ان شوية التنظيم الصغيرين بيعكسوا عليك بهجة و ايجابية، الهدف من ان المكان اللي انت عايش فيه يكون منظم مش عشان انت بتحبه منظم أو عشان انت شخص منظم لكن عشان تجعل حياتك أكثر سهولة.

وعشان تحقق دا لازم تحدد الاوليات الخاصة بيك و تقرر ايه انت محتاجه و ايه عندك استعداد تستغنى عنه و ايه هو اللي مسبب لك مشاكل في التنظيم من الاساس، و لازم تكون عارف انه بلاش تشتري حاجه او تحتفظ بحاجه ملهاش مكان و ملهاش استخدام فعلي.

عشان كده انه يبقى عندك شوية أدوات تساعدك في تنظيم الببيت دا هيساعدك كتير توفر وقت و جهد و تعيش حياه مريحة أكثر.

هنبدأ بشوية نصايح لازم نحطها في الأعتبار عشان المكان اللي احنا عايشين فيه يبقى منظم و كمان نقدر نحافظ عليه :

ببساطة كل لما يكون معندكش حاجات كتير في البيت و اللي معظمها بتكون اشترتها عشان مجرد عجبتك مش عشان انت فعلا محتاجها في البيت كل ما الحاجات هتقل و هتبقى مش محتاج لتنظيم و ترتيب أكثر ، كمان انت محتاج لو هتستخدم حاجه أو لو هتشتري حاجه تكون عارف ليها مكان محدد تقدر تحطها فيه بدل ما ترميها على السفرة أو تحطها في اي مكان و كمان لو بيتك مساحته صغيرة انك تكون منظم اكيد دا هيساعدك تستفيد بكل المساحات المتوفرة بالبيتsmiley.

وأهم قاعدة ممكن تمشي عليها عشان تمتلك بيت منظم و مرتب تقدر تستمتع بالعيشة فيه بطريقة أفضل انك تتمرن و تتعود انك تحط كل حاجه مكانها بعد ما تستخدمها.

من الأخطاء الكبيرة اللي بيقع فيها معظم الناس انهم بعد ما يقعدوا بالساعات و الايام يرتبوا و ينظموا و يشتروا أدوات تساعدهم أكثر على التنظيم فممكن يهدوا كل حاجه في لحظة عشان هم مش متعودين على النظام أو ممكن يكون في أطفال صعب السيطرة عليهم.

في الدليل دا هنحاول تمشي معاكوا خطوة خطوة و هنقولكم اقتراحات و أدوات ممكن تستخدموها كل يوم عشان تساعدكوا تعيشوا حياة منظمة و أكثر سهولة .

1-هنبدا بغرفة غرفة في البيت ابتدءاً بالمطبخ:

عشان تتفادى اي لخبطة في درج المعالق و الشوك و السكاكين في حل سهل جدا ممكن تعمله انك تشتري منظم أدراج ناس كتير بتحس انه ملوش لازمة لكن لما بتستخدمة بيكون أكيد في فرق ، ممكن نشتري منظم الأدراج دا من أي مكان بيبع حاجات خاصة بالمنزل أو لو مش لاقي ممكن بسهوله جدََا انك تعمل منظم ادراج بنفسك و تثبتة في الدرج.

نتيجة بحث الصور عن ‪organize home‬‏

نصايح للتنظيم و استخدام بعض الأدوات اللي ممكن تساعدك في تنظيم المطبخ:

1-لازم أي جهاز خاص بالمطبخ و اي أداة من أدوات المطبخ بعد ما تستخدمها ترجع تحطها تاني في مكانها و دا هيساعدك كتير و هيخليك تقدر تحافظ على ترتيب المطبخ لأطول فترة ممكنة.

2- بلاش يكون عندك 20 زجاجة مياه هتعمل زحمة في التلاجة و هتاخد مجهود كبير عشان تملا الكمية دي كلها.

3- أفصل بين ادوات الطبخ اللي بتستخدمها يوميا للسفرة و بين أدوات و اواني الطبخ اللي بتتحط في الفرن.

4- كل مطبخ بيبقى فيه كمية توابل و حاجات مش بنستخدمها و غالبا بتكون باظت أو بقت قديمة و النكهة بتاعتها راحت عشان كده لو عندك توابل اتأكد انها سليمة و متشتريش تاني اكثر من حاجتك.

5-كمان و انت جاي تشتري اكل اشتري كل اسبوع الكمية اللي هتحتاجها عشان الاكل يفضل صحي و كمان عشان متعملش لخبطة عالفاضي جوا التلاجة او لو مليت التلاجة على اخرها سعات بيخلي الاكل يبوظ عشان كدا حاول تشتري أكل على قد الاحتياجات و مش أكثر.

6- خلى عندك صندوق أو سلة في المطبخ عشان تحط فيها كل الحاجات اللي ملهاش مكان أو اللي بتستخدمها طول الوقت.

7- ممكن كمان تستخدم “ Magnetic wall strip” عشان توفر مكان و عشان يكون كل أدوات المطبخ في متناول ايدك

8- لو لسه المطبخ ملخبط او مفيهوش مكان يبقى كده في حاجات كتير لازم تستغنى عنها و ترميها لانها عملالك لخبطة في المطبخ وبدون أهمية.

و دي افكار لترتيب المطبخ بطرق مختلفة:

2- غرفة الغسيل أو مكان الغسيل:

عشان تستمع بغرفة غسيل منظمة :

1-ممكن تستخدم 3 سلات كل واحدة مكتوب عليها اسمها واحده للغسيل الملون، و واحدة للغسيل الابيض و واحدة للغسيل الرقيق و ممكن تزود واحدة كمان للجوارب

2-ممكن كمان تشتري سلة كبيرة عشان تحط فيها كل الغسيل المترتب بعد أن يجف ودا هيساعد دائما لما تيجي بعد كده تنظمها في الدولاب.

3- أي منظفات أو حاجات بتستخدمها مع الغسيل في الغالب بتعمل لخبطة و كركبة على الفاضي و السبب ان مش دايما بيكون ليها مكان او دولاب ممكن نستفيد بأي مساحة صغير جنب الغسالة أو وراها

نتيجة بحث الصور عن ‪organize home‬‏

4- من الحاجات المهمة اللي ممكن تساعدك كمان في البيت و خصوصا في غرفة و وقت الغسيل هي ارشادات الغسيل اللي بسبب عدم العلم بيها هدوم كتير ياما باظت مننا

3-غرفة المعيشة أو غرفة الجلوس:

الغرفة دي في الغالب بتكون هدفها الاساسي الاستمتاع و التلفزيون و لعب البلايستيشن او تاخدلك فيها تغفيلة وعشان تقدر تستمتع و انت قاعد في الغرفة دي أكيد لازم تكون نظيفة و مرتبة عشان تساعدك على الاسترخاء اكثر
الادوات اللي لازم تكون ديما متوفرة في الغرفة دي هي :

1-سلة مهملات:

الناس في الغالب بتنسى تحط سله مهملات في كل غرفة في البيت و من أهم الغرف اللي مينفعش تتنسي هي غرفة المعيشة ودا بسبب اننا بنقضي فيها معظم الوقت وسعات بناكل فيها كمان عشان كده مهم جدا يكون في سلة نرمي فيها كل الاوراق و الحاجات اللي عايزة تترمي اول بأول.

2-منظم اسلاك

و بسبب ان غرفة المعيشة بتبقى فيها أجهزة الكترونية كتير فدايما بيبقى في توصيلات كهرباء كتير و أسلاك كتير و عشان نتفادي انها تتقطع أو تتكعبل في بعض ممكن نستخدم منظم أسلاك عشان نرتب فيه الاسلاك دي فيها و دي كمان طريقة كويسة عشان نبعد الاطفال بعيد عن اسلاك الكهرباء.

3-حامل مفاتيح:

لو انت مدمن تتفرج عالتلفزيون أو بتحب تدخل البيت تقعد على طول تريح يبقى اكيد غرفة المعيشة هي أول غرفة بتعدي عليها عشان كده ممكن تحط فيها حامل مفاتيح ترمي فيه مفاتيحك و موبايلك عشان منقعدش كل يوم تدور و تفتكر انت حطتهم فين .

4-كرسي تخزين:

من الأدوات المفيدة جدا اللي ممكن تستخدمها في أي مكان في البيت ، لانه كرسي و كمان مكان تخزين للحاجات اللي ملهاش مكان محدد أو للحاجات اللي محتاج توصلها بسهولة .

4-غرفة الدولاب:

وهنقولك في الجزء دا شوية نصايح تساعد ان الدولاب يكون منظم و تخليك تعرف تلاقي اللي انت عايزة بسهولة :

1- أول نصيحة ممكن تستفيد بيها هي اتعلم تستخدم كل المساحات اللي موجوددة بشكل صحيح و منظم

2- الهدوم بتاعت الموسم شيلها في مكان تخزين بعيدا عن الهدوم اللي بتستخدمها حاليا عشان متتلخبطش كل شوية

3- خليك ماشي بقاعدة انك اكيد لو شايف الهدوم هتلبسها لكن طول ما هي ملخبطة هتبقى مش عارف تلبس ايه

4- دايما خلي عندك شماعتين تلاته في الدولاب عشان لو في هدوم عايزة تتغسل بس مينفعش تغسل في الغسالة او لو في هدوم عايزة تتصلح عشان متنسهاش.

ترتيب الهدوم :

اتبع النصايح دي انت جاي تطبق و ترتب اي هدوم :

1- الملابس الصوف دايما بيبقى مش مستحب انها تتعلق في الشماعة عشان بتسيب علامات مش بتروح غير لما تتغسل

2- بلاش ترص هدوم كتير فوق بعض في الارفف عشان ممكن تقع وتتلخبط

3- لو محتاج الارفف تبقى متقسمة اكثر من السهل تتفق مع أي نجار يعملك ارفف بالمقاس اللي انت محتاجه بالظبط

4- متنساش دايما تربط الشرابات مع بعض عشان دايما بيتبقى فردا واحد من الجوارب و بتضيع مننا.

و دي شوية أدوات و أفكار ممكن تساعدك في التنظيم:

1- منظم الكوفيات و الايشاربات

2- صندوق حفظ ملابس

3- للشماعات استخدمات اخري

5-غرفة النوم:

1- أكيد اهم قطعة اثاث موجودة في غرفة النوم هي السرير و هو اكيد اللي بيشغل تقريبا اكبر جزء منه عشان كده اكيد انت هحتاج ديما يكون مرتب و منظم .

2- اكيد بيبقى في تسريحة و ادراج و عشان كده متنساش تستخدم منظم الادراج التي ستساعدك على الحفاظ على كل من الاشياء مجوهراتك منظمة و مش متشابكة

3- كمان لو السرير مفيهوش مكان تخزين ممكن تستخدم وحدات التخزين المفتوحة بالعجل بتكون سهله الاستخدام و بتقدر تحط فيها حاجات كتير جدا أكيد مفيش حد بيحب يعيش في مكان ملخبط عشان دايما بيكون سبب في الأكتئاب و التوهان عشان كده لما بتحاول تخلي حياتك و بيتك منظم بمساعدة شوية الادوات هتلاقي ان شوية التنظيم الصغيرين بيعكسوا عليك بهجة و ايجابية في البيت و خارج البيت كمان، التنظيم بياخد وقت اكيد بس الحياة بنظام اكيد اسهل كتير و دا الهدف الاساسي من التنظيم.

  • Post author:
  • Post published:14 أبريل,2017
  • Post last modified:27 يوليو,2018